الزمالك وبيراميدز تواصلا مع وكيلي.. والأولوية بالنسبالي الأهلي
الأربعاء 16/أكتوبر/2024 – 11:23 م
كشف محمد شريف مهاجم فريق الخليج السعودي حقيقة عودته إلى الدوري المصري خلال الفترة المقبلة، من خلال بوابة الأهلي أو الزمالك أو بيراميدز.
تصريحات محمد شريف
وقال محمد شريف في تصريحات تليفزيونية: ما زلت مصابًا وسأغيب فترة لكنها ستكون قليلة عقب فترة التوقف الدولي.
وأضاف: أنا في شهر يناير هكون لاعب حر الناس هنا كويسين معايا وأنا ملتزم بعقدي معاهم لحد ما نشوف الدنيا إيه في شهر يناير وبحترم المكان اللي بلعب فيه، لكن أنا ناقصلي شهرين وأبقا لاعب حر وطبيعي اسمي هيتذكر في أندية تانية ووكيلي بيلمحلي بالأندية لكنه مش عاوز يشغلني شوية وأنا مركز مع نادي الخليج.
وأوضح: محصلش أي تواصل معايا من جانب الأهلي لكن في أندية تانية الزمالك وبيراميدز تواصلا مع وكيلي.
وأشار محمد شريف خلال تصريحاته: الجنيه في الأهلي بـ10 برة والأولوية بالنسبالي للنادي الأهلي.
واستمر: مباراة سيراميكا كليوباترا صعبة جدًا على الأهلي، وبيراميدز بردو ماتشه صعب مع الزمالك، والبطولة صعبة جدًا على الفرق الأربعة، وطبيعي الأهلي هيبقا مضغوط أكتر عشان لسه خسران السوبر الإفريقي.
وزاد في تصريحاته: آخر فترة لي في الأهلي مكنتش أحسن حاجة، وأطلع وأنا مش بلعب أحسن من إني أقعد على الدكة لأني شخص غيور جدًا وبحب ألعب ويكون ليا دور مع الفريق اللي بلعب في صفوفه وكنت حابب أطلع ألعب لأني كنت حاسس إني مليش دور في الأهلي.
وأتم محمد شريف تصريحاته بالحديث عن وسام أبو علي، حيث قال: بدايات وسام أبو علي كويسة وإن شاء الله يكمل على كدة وبتمناله التوفيق الفترة المقبلة.
