كان قلبها حاسس وأصرت إنها تروح| بث مباشر

توفيت الحاجة أفندية محمد عبد الشافي عتمان، صاحبة السبعين عاما، ابنة مدينة قويسنا في محافظة المنوفية، بعد الانتهاء من الوقوف بعرفات خلال أداء مناسك الحج بالمملكة العربية السعودية، ليرتفع أعداد المتوفين من محافظة المنوفية هذا العام إلى 14 متوفيا حتى الآن.

وقال نجل الحاجة أفندية إنها كل عام كانت تقدم في القرعة لكن لم يكن يأتي اسمها، فتحزن كثيرا وتتعب، مضيفا: كانت بتحزن وتتعب لدرجة إننا مكناش عايزين نقدملها تاني في الحج علشان متزعلش لو اسمها مجاش في القرعة.. راحت الحج بتأشيرة زيارة وكنا رافضين كلنا لكن هي أصرت إنها تسافر وتروح تحج السنة دي.. كانت دايما دعوتها إنها تطلع الحج وتموت على عرفات وربنا ناولها.

واستكمل نجل الحاجة أفندية المتوفاة خلال أداء مناسك الحج: كانت بتودعنا بطريقة باين إنها آخر مرة.. وكانت واخده معاها 3 كيلو غلة أكل للحمام، وكان وزن الشنطة تقيل فابنها بيقولها هشيل أكل الحمام دا رفضت بشدة وقالتله شيل أي حاجة إلا أكل الحمام.

وتابع نجل الحاجة أفندية: في نفس يوم وفاتها بعتت لنا رسالة مبكية قبل ما تطلع على عرفات، بتوصينا فيها على نفسنا وبتوصينا على أخواتنا البنات، وبنطمنها ونقولها أخواتنا البنات في عينينا.