كنا نقدر نسجل على الأهلي بعد ما اتعادلنا.. وهدفنا نكسب بيراميدز
الأحد 20/أكتوبر/2024 – 11:51 م
علّق محمد بسام حارس مرمى فريق سيراميكا كليوباترا عقب هزيمة فريقه أمام الأهلي في نصف نهائي كأس السوبر المصري بدولة الإمارات العربية المتحدة.
تصريحات محمد بسام
وقال محمد بسام في تصريحات تليفزيونية: الحمد لله على النتيجة والأداء، تاني سنة على التوالي في السوبر المصري بأداء محترم والناس كلها بتتكلم علينا لكن محالفناش التوفيق.
وأضاف: هدف الأهلي الأول بعد 11 ثانية من بداية المباراة كان عدم توفيق مننا، ولو دخلنا الماتش بدري شوية كان الموضوع بقا أصعب على الأهلي، ولكننا قدرنا نمسك نفسنا وكنا نقدر نسجل على الأهلي بعد ما اتعادلنا وكنا متعاهدين نعمل اللي علينا ومفيش لاعب قصّر وكلهم بذلوا المجهود عشان ربنا يكرمنا بالمكسب واللي ربنا كاتبه هو اللي حصل.
وتابع: لاعيبتنا كبيرة وكان عندنا لعيبة كبيرة الموسم الماضي ورحلوا وجه بدالهم لعيبة كبيرة تانية واللي مشي جه مكانه لاعيبة كويسة واحنا عندنا سيستم واحد والصفقات الجديدة بتدخل واحدة واحدة في السيستم وأتمنى تبقا دي البداية وربنا يكرم في اللي جاي.
وأردف: الهدف الأول لـ الأهلي توفيق من ربنا.. وأنا مكنتش أقدر أطلع أمسك لأنها كانت هتبقا ضربة حرة غير مباشرة.
وأكد محمد بسام خلال تصريحاته: الخطأ كلنا مشتركين فيه ومحدش مشارك لوحده في الخطأ ودا توفيق كبير من ربنا زي اللي حصل السنة اللي فاتت بردو بهدف ذاتي في الثانية الأخيرة.
وأتم الحارس حديثه قائلًا: هدفنا نكسب بيراميدز وتحقيق البرونزية ولكننا كان هدفنا البطولة من الأول وقدر الله ما شاء الله فعل.
