كنت بخوف البنات ومش مؤمنة بالكلام ده

الجمعة 14/يونيو/2024 – 06:40 م

علقت الفنانة إيمي طلعت زكريا على حالة الجدل التي أثارتها خلال الساعات الماضية، بعد تصريحاتها بشأن معاناتها من الحسد والجن العاشق ووقف مشاريعها الفنية وكذلك الارتباط والزواج، واستعانتها بالعديد من المشايخ وصولًا إلى أمين الفتوى بالأزهر الشريف.

وقالت إيمي طلعت زكريا في تصريحات لـ القاهرة 24: بمناسبة كلامي عن الجن العاشق والحسد، كنت بوعي البنات ولكن أنا كويسة مفيش أي حاجة، بصلي وبعمل عمرة وعارفة ربنا، ومش مؤمنة بالجن العاشق أو المس.

إيمي طلعت زكريا: هتجوز قريب

وأضافت إيمي طلعت زكريا: أنا شايفة بنات كتير بتفكر في موضوع جوازي اتأخر بسبب إني معمولي عمل، أنا مش مؤمنة بكده ولكن أنا حبيت أوجه رسالة للبنات إللي بتغني في الحمام وتقف أمام المرآة عشان يخافوا شوية، ولكن الموضوع عندي ملوش أساس من الصحة.

واستكملت إيمي طلعت زكريا: هتجوز قريب ومفيش حاجة تعطل، وبقول للبنات مش عايزاكم تنساقوا وراء الكلام ده وتاخدوه على أنه حقيقي، لأن ده مش حقيقي، طبيعي بحلم زي أي بنت لسة متجوزتش، لكن أنا كويسة ومفيش أي حاجة. 

إيمي طلعت زكريا: فيه شيوخ قالولي معمولي سحر

وكانت تحدثت إيمي طلعت زكريا عن معاناتها من الحسد والجن العاشق ووقف مشاريعها الفنية والارتباط والزواج، واستعانتها بالعديد من المشايخ وصولًا إلى أمين الفتوى بالأزهر الشريف.

وقالت إيمي طلعت زكريا، في تصريحات تليفزيونية سابقة: أنا كنت فاكرة إن فيا حاجة وتعطيل في حاجات كتير، وأنا مؤمنة جدًا بإن العفاريت أحياء عايشين معانا، وأول لما بابا توفى كنت دايما أسمعه بينادي عليا، وفي ليلة كنت راجعة من المسرح الساعة 1 بالليل، وكنت ماشية على الدائري في منطقة مظلمة، لقيت واحدة منكوشة بتشاور وخفت وجريت، ولما بصيت ورايا ملقتش حد، وسألت شيوخ وبعضهم قال في مس أو سحر أو عمل بوقف الحال.

أعمال إيمي طلعت زكريا

يشار إلى أن مسرحية الصندوق الأحمر، هي آخر أعمال إيمي طلعت زكريا، والتي عرضت في موسم الرياض، من إخراج طارق الإبياري، ويشارك في بطولتها إلى جانب النجمة ليلى علوي، كل من: بيومي فؤاد، رنا رئيس، نور إيهاب، سليمان عيد، ميمي جمال.