لاعب الزمالك يشكو من الإهمال : مستقبلي بيضيع وهبطل كورة
أطلق يوسف حسن، مهاجم الفريق الأول لكرة القدم بنادي الزمالك، عدة تصريحات نارية عبر حسابه الشخصي على موقع التواصل الإجتماعي “فيسبوك”.
وكتب يوسف حسن، قائلا : “أنا هتكلم بس مش عايز جمهور الزمالك يزعل مني في أي حاجة، أنا بسبب اللي بيحصل معايا ده هبطل كورة بالشكل ده أنا لا بتأهل ولا بتدرب ومستقبلي بيضيع”.
وتابع : “أنا الكورة هي شغلي وأكل عيشي ومش عارف أنا أذنبت في إيه ولا عملت إيه علشان اللي بيحصل معايا ده ، عمر ما حد شاف مني حاجه وحشة ولا شاف إني بعمل مشاكل أنا دايمًا في حالي، بس الي حصل فيا مش قليل عارف الناس ممكن متصدقش اللي بيحصل معايا بس وحياة الأيام المفترجه دي ، أكيد انتو عارفين على موضوع العملية و كده ومحدش كان راضي يعملها من الإدارة”.
وأضاف: “عملتها بعد مجهود كبير جدًا جدًا بعد 6 شهور قاعد في البيت، وبتحصل معايا نفس الحاجه بعد ما الإدارة الجديدة وعدتني هنوديك علاج طبيعي انت لعيب مهم وانت وانت وانت، أول شهر ودوني لدكتور علاج طبيعي اسمه د خالد الشناوي”.
وشدد: “رحت شهر و اتنين والنادي مدفعش الفلوس لدكتور العلاج الطبيعي وكل شويه هو يقولي ويطلب فلوسه ، طبعا أنا اتكسفت إني أروح تاني العلاج الطبيعي أنا بقالي 3 شهور يعتبر قاعد في البيت، وحياة ربنا وحياة ربنا ماحد عبرني بمكلمه تليفون ولا حد بيرد عليا أصلا”.
وأتم قائلا: “حسبنا الله ونعم الوكيل ف كل ظالم .. أول مره اشوف كده أول مرة أشوف ظلم بعيني فعلاً.. عمري محصلي كده في حياتي، كل ما أروح لحد يقولي اتكلم مع الادارة اتكلم يقولولي مش عارف إيه مفيش حد وقف معايا نهائي بس غلطتي اني مكنتش بطلع اتكلم .. انت جايبني بفلوس مش فلوس قليله مفروض تقدرني مفروض لاعيب منتخب مصر ، إللي بيحصل معايا أنا في نادي كبير واسم كبير وجمهور الزمالك عارف أنا بحبهم إزاي بس انا اتظلمت كتير وغلطتي اني كنت ساكت مش عايز اتكلم بفكر في مصلحتي.. لما لقيت الناس كلها بتهاجمني انا ومفكرني أنا اللي قاعد في البيت بمزاجي.. محدش يزعل مني اي حد زعلتو حقه فوق دماغي انا بحب جمهور الزمالك”.
