محمد علي رزق: خسيت بسبب المخرجين وشككوا في نجاحي بهذا العمل

تحدث الفنان محمد علي رزق عن أبرز المحطات الفنية في حياته، موضحًا أن مسلسل شبر مية ومسلسل ليالينا 80 ومسلسل الأب الروحي من أقرب الأعمال إلى قلبه، معلقًا: «وش الخير عليّ».

وقال محمد علي رزق في تصريحات تلفزيونية له عن مسلسل شبر مية: «أنا بحب المسلسل جدًا وشخصية أكرم كانت رهان لأن أول مرة أقدم دور أب وأول مرة دوري يبقى فيه هذا الكم الهائل من المشاعر الإنسانية».

تصريحات محمد علي رزق

وتابع: «وكان في رهان عليّ هل هفشل ولا هنجح وكان في ناس شايفة إني هفشل، وفي ناس كانت شايفة إني مناسب للدور وفي ناس كانت رافضاني في الدور، والوقت ده كنت لسة مثبتش نفسي».

وأضاف الفنان محمد علي رزق قائلًا: «وكنت لسة ببدأ أعمل تحويل من الكوميدي للتراجيدي.. كنت عامل بس أيوب، وبحر، وجبل الحلال كان فيه جزء كوميدي، وبعد أول اسبوع تصوير الناس اللي راهنت عليّ كانت فرحانة والناس اللي كانت رفضاني اعتذروا لي وأنا مكنتش أعرف إن كان في رهان عليّ».

واختتم حديثه عن كواليس مشاركته في مسلسل شبر مية، قائلًا: «هما قالوا لي إننا كنا رافضين وجودك وشايفين أنك هتبوظ الدور بس أنت عامل الدور حلو جدًا.. فالدور ده عزيز عليّ».

محمد علي رزق

أسرار محمد علي رزق

كما كشف أسباب فقدانه 50 كيلو من وزنه، قائلًا: «اتقالي كتير اوعى تخس علشان هتخسر ومش هتشتغل وأنت بقيت كاركتر ولو خسيت مش هتشتغل، بس أنا بصيت للموضوع بشكل تاني.. مخستش علشان مش حابب شكلي ولا علشان أسباب صحية».

وأضاف: «أنا بصيت لمستقبلي في المهنة يعني لو عايز أعمل دور ظابط مثلًا، والمشكلة مش عندي لكن في أدوار الشكل هيحكمك وفي أدوار المخرجين مش هيشوفوك غير في اللي أنت عملته.. أنا مكنش عندي مشكلة وأنا تخين أعمل دور واحد شرير لأن التخن ملوش علاقة بالطيبة والشر لكن للأسف المخرجين اللي بيجازفوا قليلين أوي فانا قررت أخس لأني زهقت أنا بقيت بعمل نفس الأدوار مع اختلاف بسيط».

استكمل الفنان محمد علي رزق قائلًا: «أنا شايف إني لو فضلت في دايرة واحدة هموت فنيًا.. وأنا شايف إن امكانياتي أكتر من شكلي.. فكان لازم أخس علشان أظهرها وكنت مراهن على ده.. أنا كنت 150 كيلو وبقيت 100 دلوقتي».

محمد علي رزق في مسلسل الاختيار

وفيما يخص كواليس مشاركته في مسلسل الاختيار، أوضح أنه تواصل مع المخرج بيتر ميمي بعد عرض الاختيار الجزء الأول، وطلب منه الانضمام للجزء الثاني.

وقال محمد علي رزق: «اتصلت ببيتر ميمي علشان أبارك له بعد الاختيار وقلتله إني سمعت عن وجود جزء تاني وعايز أشتغل معاك فيه وعند عرض الجزء الثاني محدش كلمني وبعد كدة لقيتهم بيكلموني على الاختيار 3».

وتابع: «أنا فاكر المكالمة كويس لأني كنت بحتفل بعيد ميلادي مع مراتي.. واتصلوا بيا مسمعتش التليفون وبعد شوية لقيت صديقي بيكلمني ويقولي أن الناس بتدور عليّ وبيكلموني ومش برد وكلمت الكاستينج دايركتر وقالي إن في دور في الاختيار 3 بس هو مش كبير أوي.. قلتله مش مهم مساحة الدور المهم يكون حلو وأنا عايز اشتغل في الاختيار».

واختتم: «الدور كان ممتع بالنسبة لي وكل صحابي كانوا بيقولولي أن جالي دور شبه الأدوار اللي بحبها، ومشاهدي كانت مع أحمد السقا ودي كانت حاجة حلوة لأننا مش أول مرة نشتغل مع بعض».

محمد علي رزق

محمد علي رزق