مصطفى قمر يهاجم طارق الشناوي: المفروض يقعد في البيت
هاجم المطرب مصطفى قمر، الناقد الفني طارق الشناوي، بعد تصريحاته الأخيرة ضد فيلم أولاد حريم كريم حيث وصفه بأنه من أسوأ الأعمال الفنية وليس له علاقة بالسينما.
وقال مصطفى قمر، في تصريحات تليفزيونية، ان الشناوي تعمد الهجوم عليه منذ عرض فيلم الحب الأول قبل أكثر من عشرين عامًا، مؤكدًا أن انتقاداته لم تكن فنية وإنما شخصية.
مصطفى قمر يهاجم طارق الشناوي
وأضاف قمر، أن الشناوي وصفه بالمطرب الفاشل، الذي استعان بجيل من النجمات اللاتي فقدن وهجهن وذلك خلال تجربة أولاد حريم كريم، وهو ما اعتبره مصطفى بعيد كل البعد عن النقد الفني.
وهاجم قمر، الشناوي قائلا: أنا ممكن أقول طارق الشناوي ناقد فاشل والمفروض يقعد في البيت.
وانتقد الناقد الفني طارق الشناوي فيلم أولاد حريم كريم للفنان مصطفى قمر، معلقًا: «أسوأ الأعمال الفنية بالنسبة لي في الموسم الحالي».
قال الناقد طارق الشناوي في تصريحات تلفزيونية له، إن فيلم أولاد حريم كريم، من أسوأ الأفلام والأعمال الفنية، مضيفًا: «علي إدريس مخرج طبعًا مهم.. وزينب عزيز كاتبة مهمة إنما اللي عملوه مش بس مالوش علاقة بالجزء الأول».
وتابع: «ده مالوش علاقة بفن السينما اللي إحنا بنعيشه دلوقتي.. ده تراجع لزمن ما قبل الجزء الأول.. والكتابة كمان اللي كتباها زينب عزيز قديمة قوي».
وأضاف الناقد الفني طارق الشناوي: «التفاصيل دي مبقتش تجيب ولا تضحك، فالفيلم افتقد الضحك.. ومصطفى قمر في عز فشله كمطرب قرر يعمل فيلم، ومع الحريم اللي هما مش مطلوبين قوي في السينما».
واستكمل: «الوحيدة اللي كانت لها اسم ووهج ياسمين عبد العزيز، عشان كده هي الوحيدة اللي قالت لا، عشان مش هتقبل تكون موجودة نصف بطلة أو خُمس بطلة.. مشكلة مصطفى قمر إنه عايش على الزمن القديم، مثلا عبد الحليم السينما فكرت فيه لما عمل غنوة على قد الشوق، فاتعمله فيلم مع شادية لأنه كان ناجح كمطرب».
واختتم: «لما بتفشل كمطرب السينما مش هتصعدك، اللي بيفشل كمطرب بيعتقد إن السينما هترجعه للبريق.. ومصطفى افتقد الوهج، وبيمثل الدور من غير حالة من الوهج والشغف بيمثل وخلاص حافظ وبيأدي، مش حابب».
مصطفى قمر وطارق الشناوي
قال مصطفى قمر عبر حسابه بموقع إنستجرام: ‘هو أنا مش طلبت منك تبعد عني أصلًا ومتتكلمش عني علشان متتهزأش طيب انت اللي جيبته لنفسك عموما ياللي اسمك طارق’.
وتابع: ‘انت كاتب كلام اهبل يدل للمرة المليون انك ماشفتش الفيلم وعموما اللي هيرد عليك جمهور السينما الحقيقي اللي دخل الفيلم اللي مالوش دعوة بالنفاق او مصلحة اي فيلم تاني فكرني كدة شغلتك ايه من اريع حروف بيتهيألي’.
